Tek krossen ut av Bibelen

Vårt Land

Religionsvitar Helge Fauskanger

Vi kan ikkje vite at Jesus døyde på ein kross, meiner bibelomsetjar. Å fjerne den vil den verste merkevarebrølaren i verdshistoria, svarar professor.

– Romarane avretta folk på pælar med forskjelleg utforming. Stokkane kunne vere stilt opp i X-form, T-form eller til og med berre vere ein enkel pæl, der armane til offeret stakk rett opp, forklarar religionsvitar Helge Fauskanger til Vårt Land.

Han er aktuell med ei ny omsetjing av Det nye testamentet. Der tek han opp omsetjinga av det greske ordet «staurós», som tyder staur eller pæl. Fauskanger meiner det blir «innskrenkande» å kalle det ein kross.

– I kristen tradisjon tenkjer ein seg at Jesus døydde på to stokkar som danna ein kross. Eg seier ikkje at dette er feil, men ordet «staurós» står berre for den ståande pælen, seier han.
Ifølgje Fauskanger er krossen ein underforstått trivialitet i Bibelens grunntekst, men at ein ved å bruke ordet kross gir den mykje større symbolsk tydnad enn den eigentleg hadde.

– Omsetjinga til kross er ei valdsam poengtering av ei form som ikkje finst på gresk. Men dagens kristne vil gjerne sjå ein kross, fordi det er eit symbol for dei, meiner religionsvitaren.
Morten Beckmann, stipendiat ved Universitetet i Agder, meiner Fauskanger kan ha eit poeng. Beckmann skriv for tida doktorgrad om Bibelselskapet sine omsetjingar av Bibelen.

– Krossen som symbol er så sterkt i kristendomen, så det legg nok veldig sterke føringar for kva ord ein vel, seier han.

Les mer i Vårt Land